Корҳо оид ба беҳтар кардани низоми ғизои мактабӣ дар Тоҷикистон идома доранд. Дар доираи Барномаи давлатии рушди ғизои мактабӣ барои солҳои 2022-2027, бо дастгирии Барномаи ҷаҳонии озуқавории СММ, мутахассисони Институти хизматрасонии хӯроки саноатӣ ва иҷтимоии Русия арзёбии васеи техникии вазъи ошхонаҳои мактабӣ дар вилояти Хатлонро анҷом доданд.

Аз 23 то 26 декабри соли гузашта коршиносон ба таҳқиқи инфрасохтори ошхонаҳои мактабҳои ноҳияҳои минтақаи Бохтар оғоз намуданд. Мониторинги мазкур ноҳияҳои Хуросон, Кӯшониён, Вахш, Дӯстӣ, Қубодиён, Шаҳритус, Носири Хусрав, А.Ҷомӣ, Ҷ.Балхӣ, Панҷ ва Ҷайҳунро фаро гирифт.

Фавран пас аз таътили Соли навӣ, аз 06 то 09 январ, кор дар минтақаи Кӯлоб идома ёфт. Коршиносон аз шаҳру ноҳияҳои Кӯлоб, Норак, Ёвон, М.С.А. Ҳамадонӣ, Данғара, Фархор, Темурмалик, Восеъ ва Балҷувон дидан намуданд.

Мақсади ташрифҳо на танҳо омӯзиши бино буд. Мутахассисон ҳолати техникии ошхонаҳоро дидан намуда, имкониятҳои ошхонаҳоро ва мутобиқати онҳо ба талаботи муосир арзёбӣ карданд.

Айни замон тамоми маълумоти ҷамъовардашуда мавриди коркард ва таҳлил қарор дорад. Дар асоси натиҷаҳо, нақшаи муҷаҳҳаз кардани мактабҳо бо таҷҳизоти нави технологӣ таҳия карда мешавад. Интихоби таҷҳизот бо дарназардошти талаботи ҷории танзимкунанда ва ниёзҳои воқеии муассисаҳои таълимӣ сурат мегирад. Ин шароити бароҳат ва бехатарро барои таъмини хӯроки гарм ба хонандагони хурдсол фароҳам меорад.